Fjlpqce

Festival della Canzone Friulana Al è l’Istât dal 1959 a tignî a batisim il prin Festival della Canzone Friulana, promovût de Scuele libare Furlane e prudelât di preseâts sostignidôrs de lenghe e des tradizions dal Friûl. Suaze de rassegne al è il parc di Villa Giacomelli, a Pradaman che, viodût il grant sucès de manifestazion, e à po daspò di lassâ il puest al plui grant palasport di Udin. Il Carnera al devente cussì la gnove sede dal event, che al à une notorietât che e supere aromai i confins regjonâi, al cjape la atenzion de stampe nazionâl e al clame dongje personaçs famôs dal spetacul e de television. Un cressi di popolaritât che i agns Otante a frenin in maniere brusche: la ultime edizion e ven fate, di fat, tal 1986. Daspò di une lungje polse ve ca tornâ il Festival par iniziative dai Comuns di Pradaman e Manzan che, adun cu le Aster Noi Cultura, a àn volût tornâ a cjapâ e continuâ la tradizion inaugurade di Villa Giacomelli. Un tornâ a inviâ che, cul jutori de Regjon, de ARLeF e de Provincie di Udin, si propon di stiçâ lis capacitâts creativis di autôrs, compositôrs e musiciscj, testemoneant la straordenarie capacitât de lenghe furlane di rignuvisi e adeguâsi ai timps, restant però simpri se stesse. Un tornâ a inviâ che nus lee in maniere direte a une des tradizions plui antighis e difondude dal Friûl, il cjantâ, espression sclete de nestre culture. Une ereditât dal passât che il Festival della Canzone Friulana al contribuìs a stramanâ e a tignî simpri vive.

SEGRETERIA DEL FESTIVAL DELLA CANZONE FRIULANA Comune di Manzano - Ufficio Cultura e Turismo via Natisone, 34 - 33044 Manzano (UD) Tel: 0432 938376 - Fax: 0432 938351 info@festivaldellacanzonefriulana.it www.festivaldellacanzonefriulana.it