Gagauziyanın 10-cu yıldönümü yortusuig_0;·: Mib_ T r U Zzr aos_j B34ldi DSscWwa1Oc28;or1i
Yortuyu kutlamaa deyni Gagauziyanın baş kasabasına Komrata büük musaafirlär geldilär: Moldova Prezidenti Vladimir VORONİN hem Türkiyenin 9-cu Prezidenti Süleyman DEMİREL, Moldova Parlamentin Predsedateli Evgeniya OSTAPÇUK, Premyer-ministrusu Vasiliy TARLEV, Moldovada Türkiye Büükelçisi Fatma Fırat TOPÇUOGLU, Türkiye İşbirlii Kalkınma Agenstvonun Başkanı Hakan FİDAN, Türkiyedä Moldova Büükelçisi Viktor ŢVİRKUN, Moldova Parlamentin Predsedatel yardımcıları V.MİŞİN hem M.KOMERZAN, Moldova Pravitelstvosunun azaları, Moldova deputatları.
Gagauzlarlan yortuyu paylaşmaa deyni {{Türkiye]]dän, Azerbaycandan, Tatarstandan, Rusiyadan, Biyaz rusiyadan musaafirlär hem Moldova Respublikasında bulunan diplomatik misiyaların başları gelmiştilär.
Gagauziya Başkanı Georgiy TABUNŞÇİK hem GHT Başı Stepan ESİR en üüsek musaafirleri Moldova Prezidentini Vladimir VORONİNı hem Türkiye 9-cu Prezidentini Süleyman DEMİRELi Gagauziya İspolkomunun önündä karşladılar. Adetä görä musaafirlerä tuz-ekmek verildi hem, belliki, birär filcan şarap ikram edildi.
Gagauziyanın 10-cu yıldönümü kutlamak toplantısı Komratın Kultura Binasının salonunda oldu. Toplantı Moldova hem Gagauziyanın gimnalarınnan başladı. Sora dokladlan Gagauziya Başkanı Georgiy TABUNŞÇİK konuştu. Kutlayıp salonda bulunannarı bu büük yortuylan, Canabisi Gagauziyanın 10 yıl içindä kazanılan soţial, ekonomika hem kultura adımnarı için annatı.
Moldova Prezidenti Vladimir VORONİN kendi kutlamak sözündä urguladı, ani Moldova gösterdi dünneyä, ki etnikarası problemalarını şivilizaşiya uurunda var nicä çözmää.
Açan söz verildi Türkiyenin 9-cu Prezidentinä Süleyman DEMİRELä, zal ayaa kalktı, zerä zalda bulunannar hepsi saygı duyardılar bu büük politik hem devlet adamına. Bilärdilär, ani Süleyman DEMİREL olmaydı, bekim Gagauziya avtonomiyası da olmayaceydı.
Kendi konuşmasında Süleyman DEMİREL metetetti gagauz halkını, ani onnar asirlär boyunca kendi dilini, kulturasını hem adetlerini koruyabilmişlär. Bu ii bir varlıktır. O söledi, ani avtonomiya büünkü insannara diil, gelecek insannara deyni kuruldu. Açıkladı, ani Balkannarda milli soruşların çözülmesi için kan döküldü. Ama bölä bir olay Moldova topraklarında olmadı. Sayın Süleyman DEMİREL urguladı, ani Türkiye her zaman çalışêr, ki Balkannarda, Moldovada barış hem raatlık olsun.
Kırım ayın (dekabri) 22-dä Kişinövda olan Konferenţiya için söleyeräk, Süleyman DEMİREL urguladı, ani bu türlü Konferenţiyalar bir problemanın nasıl çözülmesini konuşêrlar, Konferenţiyada sa barış içindä çözülmüş bir problema konuşuldu. Büün gagauzlar hem moldovalılar barış içindä yaşêêrlar. Kuvettä bulunan insannarın hem partiyanın bunda büük bir rolü var. Süleyman DEMİREL kutladı Vladimir VORONİNı onunnan, ani onun partiyasının kuvedä gelmesindä Gagauziya da büük rolü aldı. Canabisi kutladı Gagauziya Başkanını Georgiy TABUNŞÇİKi Gagauziyanın ilerlemesindä büük çalışmalarlan. Kutladı GHT Başını Stepan ESİRi o gözäl dokladlan, ani o okudu Kişinövdakı Konferenţiyada. Süleyman DEMİREL urguladı, ani “Gagauzça hem gagauzlar yaşêêr...” Zalda bulunannara danışarak dedi: “Gagauziyayı da, gagauzları da yaşatmaya devam edin”.
Türkiyenin 9-cu Prezidenti kendi sözünü bölä tamamnadı: “Yaşasın Türkiye-Moldova ilişkileri, dostluu, kardaşlıı! Yaşasın Türkiye-Gagauziya kardaşlıı! Yaşasın Moldova hem Gagauziya! Hepsinizi saygıylan, sevgiylän kucaklêêrım!”
Sora söz verildi Azerbaycan delegaţiyasının başına, angısı okudu Azerbaycan Prezidentin İ.ALİEVın Gagauziya öndercileri adına yollanılan telegramayı hem Azerbaycan Prezidentinin gagauzlara baaşışını verdi.
Toplantıda söz tutan TÜRKSOY Başkanı Palad BÜLBÜLOĞLU kutladı gagauz halkını bu büük yortuylan, annattı TÜRKSOYun türk dünnesindä hem Gagauziyanın TÜRKSOYda rolü için, TÜRKSOY adından Prezidentlerä birär baaşış baaşladı, Gagauziya kultura Bakannıına da 1000 dolar yardım verdi.
Gagauziyanın 10-cu yıldönümünü kutlamak toplantısına hepsi katılannara baaşış verildi: Gagauziyanın bayraannan hem “Gagauziya. 10 yıl” yazısınnan kol saadı, üç dildä yazılı Gagauziyanın temel Kanonu hem maasuz bu yortu için tipardan çıkarılanâ 104 yıl geeri yazılı olan Valentin MOŞKOVun “Гагаузы Бендерского Уезда” kiyadını.
Hepsi konuşmalardan sora musaafirlerä deyni bir konţert gösterildi. Konţerttä pay aldılar Kişinöv Organ salonun simfonik orkestrası, opera artistleri: Moldova halk artisti Mariya BİEŞU, Stepan KURUDİMOV, Marina RADİŞ, Galina VLAD. Kişinövdan oyun ansamblisi “Kodränka”. Gagauz ansamblileri “Düz Ava” hem “Kadınca”.